सुर्खेत। कर्णाली नदीमा जलविद्युत् विकासको अर्को सम्भावना अघि बढेको छ। लामो समयदेखि रोकिएको बेतन कर्णाली जलविद्युत् आयोजनाले अन्ततः सरकारी अनुमति पाएको छ। अब कर्मचारी सञ्चयकोषको लगानीमा बन्ने ४३९ मेगावाट क्षमताको अर्धजलाशययुक्त यो आयोजना निर्माणको प्रक्रियामा प्रवेश गरेको हो।
यसअघि माथिल्लो कर्णाली जलविद्युत् आयोजना सञ्चालित भारतीय कम्पनी जिएमआर ले बाँध प्रभावित हुने भन्दै बेतन आयोजनाको निर्माणमा आपत्ति जनाउँदै आएको थियो। तर, उक्त विवाद अन्ततः समाधानमा पुगेको छ।
ऊर्जा, जलस्रोत तथा सिँचाइ मन्त्रालयअन्तर्गत विद्युत विकास विभागले विद्युत ऐन, २०४९ तथा नियमावलीअनुसार आयोजनालाई निर्माण अनुमति दिएको हो। विभागले शुक्रबार आयोजित बैठकमा बेतन कर्णालीलाई उत्पादन अनुमति दिएको पुष्टि गरेको छ।
बेतन कर्णाली आयोजनाको बाँध अछाम र सुर्खेतको सीमाक्षेत्रमा निर्माण हुनेछ। आयोजनासम्बन्धी अन्य संरचनाहरू — विद्युतगृह, बेस क्याम्प तथा सुरुङ मार्ग भने ढकारी गाउँपालिका–६ (सुर्खेत) मा पर्नेछन्।
बेतन कर्णाली जलविद्युत् आयोजनाले २०८१ साल भदौमा विद्युत उत्पादन अनुमति माग्दै विद्युत विकास विभागमा आवेदन दिएको थियो। तर, माथिल्लो कर्णाली आयोजनाको सम्भावित असर र समन्वय अभावका कारण यसको प्रक्रिया लम्बिँदै आएको थियो।
अब भने अनुमति प्राप्त भएपछि आयोजना निर्माण अगाडि बढ्ने निश्चित भएको छ, जसले कर्णाली प्रदेशको ऊर्जा उत्पादनमा उल्लेखनीय योगदान पुर्याउने अपेक्षा गरिएको छ।
