११ माघ, एजेन्सी। डोनाल्ड ट्रम्प जनवरी २० मा अमेरिकाको ४७ औँ राष्ट्रपति बनेका छन् । राष्ट्रपति बनको पहिलो दिन नै रुस–युक्रेन युद्ध रोक्छु भन्ने आफ्नो पुरानो दाबीमाथि प्रतिक्रिया दिएका छन् ।
‘आधा दिन मात्र बित्यो । मसँग अझै आधा दिन बाँकी छ । के हुन्छ हेरौँ न ।’ राष्ट्रपति कार्यालयमा पत्रकारहरूले ट्रम्पलाई यस विषयमा प्रश्न गर्दा उनले भनेका थिए ।
ट्रम्पले केही आदेशमा हस्ताक्षर गरेपछि ओभल अफिसमा पत्रकारहरूको प्रश्नको जवाफ दिने क्रममा यस्तो बताएका हुन् । यस क्रममा उनलाई युक्रेन युद्धबारे सोधिएको थियो र यो द्वन्द्वमा चीनले के योगदान दिन सक्छ भन्ने बारेमा पनि सोधिएको थियो । जवाफमा ट्रम्पले चीनको बारेमा भने, ‘रुसमाथि उसको धेरै प्रभाव छ । रूसले चीनलाई ऊर्जा आपूर्ति गर्छ र मैले सुनेको छु कि पुटिन मसँग भेट्न चाहन्छन् ।’
‘यो युद्धलाई अन्त्य गर्नु नै राम्रो हुनेछ, यो बेकारको युद्ध हो ।’ अझ अगाडि उनले भने । यदि भ्लादिमिर पुटिनले युक्रेनमा युद्ध समाप्त गरेनन् भने, उनले रुसमाथि कडा प्रतिबन्ध लगाउने ट्रम्पले हालै चेतावनी दिएका थिए । युद्ध अन्त्य गर्न दबाब दिएर पुटिनमाथि उल्टै कृपा गरिरहेका पनि ट्रम्पले आफ्नो सामाजिक सञ्जाल प्लेटफर्म ट्रुथ सोसलमा लेखेका थिए ।
