काठमाडौं। विश्वकै ठूलो भिडियो साझेदारी प्लेटफर्म युट्युबले ‘ट्रेन्डिङ’ सेक्सन हटाउने निर्णय गरेको छ। केही साताभित्रै ट्रेन्डिङ पृष्ठ र ट्रेन्डिङ नाउ सूची बन्द गर्दै युट्युबले नयाँ चार्ट-आधारित वर्गीकरण प्रणाली ल्याउने तयारी गरेको हो।
कम्पनीका अनुसार, यो परिवर्तनले विषयवस्तुको खोजीमा विविधता र स्पष्टता थप्ने लक्ष्य लिएको छ। सन् २०१५ मा भाइरल सामग्रीलाई प्राथमिकता दिँदै ल्याइएको ट्रेन्डिङ सेक्सन अब हटाइने छ। यसको सट्टा युट्युबले “स्पेसिफिक चार्ट्स” नाम दिइएको नयाँ फीचर सार्वजनिक गर्नेछ, जसमा ट्रेन्डिङ म्युजिक भिडियो, साप्ताहिक टप पोडकास्ट शो, ट्रेन्डिङ मुभी ट्रेलर लगायतका खण्ड रहनेछन्।
कम्पनीले एक ब्लग पोस्टमार्फत भनेको छ, “चार्टमा लोकप्रिय सामग्री हाइलाइट गर्नुका साथै, हामी प्रयोगकर्तालाई व्यक्तिगत सिफारिसहरू माध्यमबाट मनपर्ने भिडियो देखाउन निरन्तर काम गर्दै जानेछौं। यसले प्रयोगकर्तालाई नयाँ भिडियो फेला पार्ने प्रक्रिया अझ स्वाभाविक बनाउँछ।”
यस निर्णयसँगै दर्शकहरूले ‘एक्स्प्लोर मेनु’, ‘क्रिएटर च्यानल्स’, ‘सब्सक्रिप्सन फिड’ जस्ता अन्य माध्यमबाट गैर-व्यक्तिगत सामग्री हेर्न र ब्राउज गर्न सक्नेछन्। युट्युबले भनिएको छ कि ट्रेन्डिङ सूची बारम्बार फ्यानको रुचिअनुसार परिवर्तन हुने भएकाले, अब यो प्रक्रिया अझ सूक्ष्म, विशिष्ट र उपयोगकर्ता-केंद्रित हुनेछ।
कम्पनीले सामग्री सिर्जनाकर्ताहरूलाई आफ्नो सामग्री कति लोकप्रिय छ भन्ने थाहा पाउन नयाँ टुल्स उपलब्ध गराइरहने पनि बताएको छ।
नेपालमा युट्युब ट्रेन्डिङ सेक्सन निकै लोकप्रिय मानिन्छ। विशेषतः फिल्म ट्रेलर, म्युजिक भिडियो, र भ्लगिङ सामग्रीका लागि यसले ठुलो प्रभाव पार्दै आएको थियो। अब ट्रेन्डिङ हटाइएपछि युट्युबको नयाँ चार्ट प्रणाली कति प्रभावकारी हुन्छ, त्यो हेर्न बाँकी छ।
