काठमाडौँ। एन्ड्रोइड प्रयोगकर्ताहरूको डाटा सुरक्षालाई ध्यानमा राख्दै गुगलले एक नयाँ सुरक्षा सुविधा सार्वजनिक गरेको छ। अब यदि प्रयोगकर्ताको स्मार्टफोन तीन दिनसम्म लक भएर प्रयोग नगरिएको अवस्थामा रहन्छ भने, फोन आफैं रिस्टार्ट हुनेछ। यो सुविधा एन्ड्रोइड अपरेटिङ प्रणालीमा प्रयोग हुने गुगल प्ले सर्भिसेसको २५.१४ संस्करण मार्फत लागू हुँदैछ।

फोन हराएमा डाटा चोरी हुन नदिन उपाय
गुगलले जनाएको अनुसार, यो प्रणाली विशेष गरी फोन हराएको वा चोरी भएको अवस्थामा डाटा सुरक्षित राख्नका लागि बनाइएको हो। लगातार तीन दिनसम्म फोन प्रयोग नगरिएपछि त्यसले स्वचालित रूपमा पुनः सुरु (Restart) हुन्छ र त्यसपछि फोन ‘बिफोर फर्स्ट अनलक (BFU)’ मोडमा प्रवेश गर्छ।

BFU मोडमा फोनमा रहेको सबै डाटा इन्क्रिप्टेड हुन्छ र पासकोड, पाटर्न वा पासवर्ड बिना फोन खोल्न सकिँदैन। यस अवस्थामा बायोमेट्रिक फिचरहरू जस्तै फिङ्गरप्रिन्ट वा फेस अनलक पनि काम गर्दैनन्।

प्रयोगकर्ताको सुरक्षामा प्राथमिकता
गुगलका अनुसार, कुनै डिभाइस लामो समयसम्म लक र निष्क्रिय रहँदा त्यो सम्भवतः हराएको वा चोरी भएको मानिन्छ। यस्तो अवस्थामा फोनलाई अटोमेटिक रूपमा रिस्टार्ट गरी BFU मोडमा लैजानुले अनधिकृत पहुँचबाट डाटा जोगाउन मद्दत गर्दछ।

यो सुविधा हालसालै एप्पलको iOS 18.1 मा प्रस्तुत गरिएको ‘इनएक्टिभिटी रिबुट’ प्रणालीसँग मिल्दोजुल्दो छ। त्यस्तै, ग्राफिन OS जस्ता गोपनीयता-केन्द्रित प्रणालीहरूमा पनि यस्ता प्रविधिहरू पहिले देखिन थालेका छन्।

सुविधा कसरी लागू हुन्छ?
गुगलले यो सुविधा गुगल प्ले सर्भिसेसमार्फत उपलब्ध गराउँदैछ, जसले गर्दा प्रयोगकर्ताले एन्ड्रोइड ओएसको ठूलो अपडेट कुर्नु नपर्नेछ। यसको अर्थ, यो सुविधा छिटो र सहज रूपमा धेरै उपकरणमा लागू हुनेछ।

यद्यपि, गुगलले स्पष्ट पारेको छ कि यो सुविधा एन्ड्रोइड स्मार्टफोन र ट्याब्लेटहरूमा मात्र लागू हुनेछ। एन्ड्रोइड स्मार्टवाचहरू (Wear OS) मा भने यो सुविधा लागू हुनेछैन।