काठमाडौँ। विश्वका पहिलो खर्बपति एलन मस्कले स्वास्थ्यका लागि आफ्नो बालबालिकालाई नेटफ्लिक्सबाट टाढा राख्न अभिभावकहरूसँग आग्रह गरेका छन्।
उनले यो अपील सामाजिक सञ्जाल पोस्टको जवाफमा गरेका हुन्। नेटफ्लिक्सले ट्रान्सजेन्डरको मुद्दालाई प्रोत्साहन गरिरहेको भन्दै उनले सम्भव भए यो स्ट्रिमको सदस्यता नै परित्याग गर्न अभिभावकलाई आग्रह गरेका छन्।
“आफ्ना बच्चाहरूको स्वास्थ्यको लागि नेटफ्लिक्स रद्द गर्नुहोस्” मस्कले एक पोस्टमा लेखेका छन्।
मस्क पछिल्ला केही वर्षयता ‘वोकिज्म’ विरुद्ध खुला रूपमा अभियान चलाएका छन् र उनले यसको विरोध गरेका छन्। मस्क लिंग परिवर्तनलगायत थुप्रै कुराको विरोधी हुन्।
उनी यसविरूद्ध बोल्दै पनि आइरहेका छन्।
उनको छोरा भिभियन विल्सनले सन् २०२२ मा लिंग परिवर्तन गरेका थिए। उनले यसपछि आफूलाई छोरीको रूपमा स्विकार गर्न सबैसँग अपील गरेका थिए। यो घटनाबाट मस्क निकै दुःखी थिए।
