२०७९ सालको संसदको चुनावपछि प्रचण्ड नेकपा(एमाले)को समर्थनमा पुष ११ गते तेस्रो पटक प्रधानमन्त्री बन्न पुगेका थिए ।
तेस्रो कालको पहिलो पटक विश्वासको मत लिंदा प्रचण्डले संसदमा उपस्थित २७० जना मध्येबाट २६८ मत पाएका थिए । उनकै भनाईमा यो मत चमत्कारिक थियो । यसपटक उनले ९९.२५ प्रतिशत मत ल्याएका थिए ।
यो १८ महिनाको बीचमा उनले पाँचौ पटक गत साउन २८ गते शुक्रबारमा फेरि विश्वासको मतकालागि संसदमा प्रस्ताव पेश गरेका थिए । गएका चारपटकसम्म लगातार विश्वासको मत लिन सफल प्रचण्ड यसपाली विश्वासको मल लिन असफलमात्र भएनन् कि उनले प्रचण्ड अविश्वासको मत पाएका छन् । अर्थात संसदमा उपस्थित १९४ मा उनले केवल ६३ मत मात्र पाएका थिए ।
त्यसको लगतै एमाले र नेपाली काँग्रेस रातारात मिलेर प्रचण्ड सरकारलाई विस्थापन गरी पहिला केपी ओली र अन्तिममा शेरबहादुर देउवा प्रधानमन्त्री हुने सहमति गरे र राष्ट्रपतिलाई सरकार गठन गर्न अनुमति दिन पत्राचार गरेका थिए । त्यस बमोजिम केपी ओलीले सउान ३० गतेका दिन प्रधानमन्त्री पद ग्रहण गरेका छन् । उनलाई राष्ट्रपति रामचन्द्र पौडेलले सपथ ग्रहण गराएका छन् ।
काँग्रेस र एमालेको संयुक्त सरकार बन्दै गर्दा विभिन्न टिकाटिप्पणी उठेका छन् । संसदमा प्रचण्डले देउवा—ओली गठबन्धनका बारेमा खेलेरै आरोप लगाएका थिए । उनको सबैभन्दा गम्भीर आरोप भनेको अहिलेको संविधानलाई मासेर जनयुद्ध र जनआन्दोलनका उपलब्धी सक्ने षडयन्त्र गरेको हो । त्यसैगरी गिरीबन्धु टीमा ओलीको संलग्नता, आरजुको भुटानी नक्कली शरणार्थी काण्डमा रहेको संलग्नतामा परेकाले त्यसबाट मुक्त हुन सरकार बदलिएको संगीन आरोप लगाएका थिए ।
