सल्यान। कपुरकोट गाउँपालिका-३ चोरखोला नजिकै खसेको पहिरोका कारण रोकिएको राप्ती राजमार्ग पुनः खुला भएको छ। डोजर प्रयोग गरी पहिरो हटाइएपछि सडकमा यातायात सञ्चालनमा आएको हो।

पहिरो खस्दा शुक्रबार विहान ११ बजेदेखि राजमार्ग अवरुद्ध भएको थियो। सडक खुलिसकेपछि रोकिएका यात्रुवाहक सवारी साधनहरूले आफ्नो गन्तव्यतर्फ यात्रा सुरु गरेका छन्।

जिल्ला प्रहरी कार्यालय सल्यानका सूचना अधिकारी प्रहरी निरीक्षक बाबुराम बस्नेतका अनुसार, चोरखोलामा बाँसबारी घुम्ती नजिक खसेको पहिरो डोजरले हटाएपछि करिब एक घण्टापछि राजमार्ग पूर्णरूपमा खुला भएको हो।