काठमाडौं। दीपेन्द्रसिंह ऐरी र आसिफ शेखप्रेरित नेपालले आईसीसी टी–२० क्रिकेट विश्वकप एसिया प्यासिफिक क्षेत्रीय फाइनलको सुपर–६ को अन्तिम खेलमा समोअविरुद्ध २१२ रनको लक्ष्य बनाएको छ ।
शुक्रबार ओमानको अल अमेरतामा जारी खेलमा टस हारेर ब्याटिङमा आएको नेपालले निर्धारित २० ओभरमा चार विकेटको क्षतिमा २११ रनको योगफल खडा गरेको हो ।
नेपालका ओपनर आसिफले सर्वाधिक ६९ रन बनाए । आसिफले ४१ बलमा सात चौका र चार छक्का प्रहार गरे ।
नेपालको निम्ति दीपेन्द्रले पनि अर्धशतक प्रहार गरे । दीपेन्द्रले ३३ बलमा दुई चौका र चार छक्का प्रहार गरे ।
लोकेश बमले १२ बलमा चार छक्कासहित ३९ रन जोडे । कप्तान रोहित पौडेलले पनि २१ रन प्रहार गरे ।
अर्का ओपनर कुशल भुर्तेलले १७ रन बनाए ।
समोअका सौमानी ताई, डारियस भाइसेर, डानियल बुर्गेस र नोअह मीडले समान एक विकेट लिए ।
नेपालले छनोटअन्तर्गत सुपर–६ को दुई खेलअगावै आगामी वर्ष हुने टी–२० विश्वकपमा स्थान बनाइसकेको छ । नेपालले समग्रमा तेस्रोपटक टी–२० विश्वकपमा स्थान बनाएको हो । यसअघि नेपालले सन् २०१४ र सन् २०२४ मा टी–२० विश्वकप खेलेको थियो ।
