काठमाडौँ। मलेसियामा जारी एसिसी प्रिमियर मेन्स कप क्रिकेट प्रतियोगितामा नेपालले लगातार तेस्रो जित दर्ता गर्दै सेमिफाइनलमा प्रवेश गरेको छ।
बायोमास ओभलमा आज भएको खेलमा नेपालले साउदी अरेबियालाई ५ विकेटले पराजित गरेको हो।
साउदी अरेबियाले प्रस्तुत गरेको १९१ रनको लक्ष्य नेपालले ४१ ओभरमा ५ विकेट गुमाएर पूरा गर्यो। नेपालका लागि गुलसन झाले ३५ बलमा ३ चौका र ३ छक्काको मद्दतले अविजित ४४ रन बनाए।
त्यस्तै, इशान पाण्डेले ४०, देव खनालले ३७ र रोहित कुमार पौडेलले २४ रनको योगदान दिए। बलिङतर्फ साउदीका इस्ताक अहमद र महम्मुद अतिफले २-२ विकेट लिए।
यसअघि टस जितेर पहिले ब्याटिङ गरेको साउदी अरेबिया ४९.२ ओभरमा १९० रनमा अलआउट भयो। साउदीका लागि अब्दुल वाहिदले ७७ र महम्मुद अतिफले ३० रन बनाएका थिए।
नेपालका कप्तान सन्दीप लामिछाने र दिपेन्द्र सिंह ऐरीले समान ३-३ विकेट तथा ललित नारायण राजवंशीले २ विकेट हात पारे। यो जितसँगै समूह ‘ए’ मा रहेको नेपाल एक खेल अगावै सेमिफाइनलमा पुग्न सफल भएको छ।
