काठमाडौं। नेपाली कांग्रेसको १५औँ महाधिवेशनबाट विश्वप्रकाश शर्मा वरिष्ठ उपसभापति र पुष्पा भुसाल महिला उपसभापतिमा निर्विरोध निर्वाचित भएका छन्।
निर्धारित समयभित्र वरिष्ठ उपसभापतिमा शर्माको र महिला उपसभापतिमा भुसालको मात्रै उम्मेदवारी परेपछि दुवै जना निर्विरोध निर्वाचित भएका हुन्। निर्वाचन समितिका अनुसार मंगलबार साँझ ७ बजेसम्म उम्मेदवारी दर्ताको समय तोकिएको थियो।
पार्टीको संशोधित विधानअनुसार यस महाधिवेशनबाट वरिष्ठ उपसभापति पद सिर्जना गरिएको हो। शर्मा यसअघि विशेष महाधिवेशनबाट उपसभापति बनेका थिए।
भुसाल पनि गत विशेष महाधिवेशनबाट उपसभापति निर्वाचित भएकी थिइन्। संशोधित विधानअनुसार कांग्रेसका चार उपसभापतिमध्ये एक पद महिलाका लागि छुट्याइएको छ।
