एजेन्सी। टीभीके (तमिलगा वेत्री कझगम) का प्रमुख तथा अभिनेता थलापति विजयको फिल्म ‘जन नायकन’ (जन नेता)को प्रदर्शन हालका लागि स्थगित गरिएको छ।
यसबारे जानकारी बुधबार फिल्मको निर्माण संस्था केभीएन प्रोडक्सन्सले दिएको हो। निर्माण संस्थाले यो निर्णय लिनु सजिलो नभएको जनाएको छ।
फिल्मको रिलिज मिति सरेको विषयमा जारी वक्तव्यमा निर्माण संस्थाले भनेको छ,
“हामीलाई अत्यन्तै भारी मनका साथ यो जानकारी साझा गर्नुपरेको छ। ९ जनवरीमा प्रदर्शन हुने तय गरिएको फिल्म ‘जन नायकन’ हाम्रो नियन्त्रणभन्दा बाहिरका केही कारणले स्थगित गरिएको छ।”
केभीएन प्रोडक्सन्सले फिल्मको नयाँ प्रदर्शन मिति चाँडै सार्वजनिक गरिने पनि जनाएको छ। साथै, दर्शकहरूलाई धैर्य राख्न र आफ्नो माया तथा समर्थन निरन्तर दिन अपिल गरिएको छ। वक्तव्यमा भनिएको छ कि दर्शकहरूको निरन्तर साथ नै उनीहरूको सबैभन्दा ठूलो शक्ति हो, र यो सम्पूर्ण ‘जन नायकन’ टिमका लागि अत्यन्तै महत्वपूर्ण छ।
फिल्मलाई प्रमाणपत्र जारी नभएको
निर्माण संस्थाको वक्तव्यमा फिल्म स्थगित हुनुको स्पष्ट कारण उल्लेख गरिएको छैन। तर, यो निर्णय त्यस्तो समयमा आएको हो, जब निर्धारित समयमा केन्द्रीय फिल्म प्रमाणन बोर्ड (सीबीएफसी)ले फिल्मलाई प्रमाणपत्र जारी गरेको थिएन।
फिल्म १८ डिसेम्बर २०२५ मा प्रमाणनका लागि पठाइएको थियो। प्रारम्भिक जाँचपछि केही दृश्य हटाउने सर्तमा यू–ए (युनिभर्सल–एडल्ट गाइडन्स) प्रमाणपत्र दिने कुरा भएको थियो, तर अन्तिम प्रमाणपत्र जारी भएन। पछि फिल्मलाई पुनरावलोकन समिति (री–भाइजिङ कमिटी) मा पठाइयो, जसका कारण प्रक्रिया झनै लम्बिएको हो।
सीबीएफसीले फिल्मबारे एउटा गुनासो प्राप्त भएको बताएको थियो, जसमा धार्मिक भावनाहरू र सेनाको चित्रणसम्बन्धी विषय उठाइएको थियो। यसमा फिल्म निर्माताहरूले भने, उक्त गुनासो स्पष्ट नभएको र त्यसमा कसैको नाम समेत उल्लेख नभएको दाबी गरेका छन्। यही कारणले उनीहरूले बोर्डको निर्णयलाई चुनौती दिएका हुन्।
प्रमाणपत्रमा भएको ढिलाइका कारण यो विषय मद्रास उच्च अदालत पुगेको थियो। निर्माताहरूले अदालतसँग तत्काल राहतको माग गरेका थिए। तर, बुधबार अदालतले यस विषयमा आफ्नो फैसला सुरक्षित राखेको छ, जसले फिल्मको समयरेखा अझै अन्योलमा पारेको छ।
‘जन नायकन’ लाई विजयको अन्तिम फिल्म मानिएको छ। विजय तमिलगा वेत्री कझगम (टीभीके) पार्टीका प्रमुख हुन्। उनको पार्टीले मार्च–अप्रिलमा हुने तमिलनाडु विधानसभा चुनाव लड्ने घोषणा गरिसकेको छ।
हालै विजयले आफ्नो अभिनय करियरबाट सन्यास लिने घोषणा गरेका थिए। ३३ वर्ष लामो फिल्मी यात्रापछि उनले अभिनयलाई बिदाइ गर्ने निर्णय गरेका हुन्। यो घोषणा उनले मलेसियामा भएको फिल्मको अडियो सार्वजनिक कार्यक्रममा गरेका थिए।
विजयले १० वर्षको उमेरमा तमिल फिल्म ‘वेत्री’ बाट बाल कलाकारका रूपमा करियर सुरु गरेका थिए। १८ वर्षको उमेरमा उनले ‘नालैया थीरपू’ (१९९२) फिल्ममार्फत नायकका रूपमा डेब्यु गरे।
सन् २०१५ को फिल्म ‘पुली’ पछि विजयको कुनै पनि फिल्म फ्लप भएको छैन। ‘बीस्ट’ (२०२२), ‘वारिसु’ (२०२३) र ‘द ग्रेटेस्ट अफ अल टाइम (गोएट, २०२४)’ जस्ता फिल्मले मिश्रित समीक्षा पाए पनि कमाइ राम्रो गरेका थिए।
