काठमाडौं। दक्षिण कोरियाली गैरनाफामूलक संस्था उम हङ गिल ह्युमन फाउन्डेसनले बाढीबाट प्रभावित नेपालका गाउँ तथा विस्थापितका शिविरमा राहत तथा सहयोग पुर्याउने भएको छ।
फाउन्डेसनका नेपाल निर्देशक तथा पूर्वकूटनीतिज्ञ एवं प्राध्यापक डा. काङ डेसेक (डेनिस)का अनुसार संस्थाले अहिले प्रभावित व्यक्ति तथा परिवारको नाम र सम्पर्क विवरण संकलन गरिरहेको छ।
प्रारम्भिक सूची तयार भएपछि स्थलगत सर्वेक्षण, लाभग्राही छनोट, सम्बन्धित सरकारी निकायको स्वीकृति, स्थलगत अनुगमन र त्यसपछि राहत सामग्री वितरण गरिनेछ।
सन् २००८ मा चर्चित दक्षिण कोरियाली पर्वतारोही क्याप्टेन उम हङ गिलले स्थापना गरेको फाउन्डेसनले नेपालका दुर्गम क्षेत्रमा शिक्षा, स्वास्थ्य तथा समुदाय विकासमा लामो समयदेखि काम गर्दै आएको छ। हाल फाउन्डेसनको नेतृत्व डा. काङले गरिरहेका छन्।
