काठमाडौँ। नेकपा (एमाले)को जारी राष्ट्रिय भेलामा पार्टीका उपाध्यक्ष विष्णुप्रसाद पौडेलले एमाले नेतृत्वको सरकारका पालामा भएका काम तथा उपलब्धिको फेहरिस्त प्रस्तुत गरेका छन् ।
भेलाको बन्दसत्रमा उपाध्यक्ष एवं पूूर्वअर्थमन्त्री पौडेलले ‘समृद्ध नेपाल, सुखी नेपाली’ को राष्ट्रिय लक्ष्यबमोजिम तत्कालीन एमाले नेतृत्वमा सरकार रहँदा अघि बढाइएका विकास निर्माण, पूर्वाधार विकास, आर्थिक सुधार, सामाजिक सुरक्षा तथा जनजीविकासँग सम्बन्धित काम र उपलब्धिबारे विस्तृत विवरण प्रस्तुत गरेका हुन् ।
उनले सरकारको नेतृत्व गर्दा लिइएका नीतिगत निर्णय, कार्यान्वयन गरिएका कार्यक्रम तथा विभिन्न क्षेत्रमा हासिल भएका उपलब्धिलाई पार्टीका नेता तथा कार्यकर्तामाझ राखेका थिए । सरकारमा रहँदा पार्टीले अघि सारेका प्राथमिकता र तिनको कार्यान्वयनको अवस्थाबारे पनि उनले जानकारी गराएका थिए ।
तीन हजार ४१४ अगुवा नेता कार्यकर्ता सहभागी भेलामा पार्टीको वर्तमान अवस्था, सङ्गठनात्मक सुदृढीकरण, स्थानीय निर्वाचनको तयारी, आगामी कार्यदिशा तथा समसामयिक राजनीतिक विषयमा छलफल भइरहेको छ ।
पार्टीका अध्यक्ष केपी शर्मा ओलीले उद्घाटन गर्नुभएको भेलाको बन्दसत्र बाँकी कामका लागि बिहीबार बिहान ८ः०० बजे पुनः सुरु हुने एमालेका प्रचार विभाग प्रमुख निरज आचार्यले जानकारी दिए ।