काठमाडौँ। तिहारको अवसरमा परम्परागत देउसी–भैलो कार्यक्रम २४सै घण्टा सञ्चालन गर्न पाइने भएको छ । गृह मन्त्रालयले यसका लागि देशभरका जिल्ला प्रशासन कार्यालयलाई आवश्यक व्यवस्था मिलाउन निर्देशन दिएको छ ।
मन्त्रालयले सोमबार सचिवस्तरीय निर्णय गर्दै सबै जिल्ला प्रशासन कार्यालयलाई पत्राचार गरेको हो । नेपाली मौलिक कला, संस्कृति र परम्पराको संरक्षण गर्दै सामाजिक सद्भाव कायम हुने गरी देउसी–भैलो कार्यक्रम सञ्चालन गर्न दिन मन्त्रालयले आग्रह गरेको छ ।
मन्त्रालयले देउसी–भैलो कार्यक्रम स्वेच्छिक र मर्यादित हुनुपर्नेमा जोड दिएको छ । कसैलाई पनि चन्दा वा दक्षिणा दिन दबाब दिन नपाइने स्पष्ट पार्दै जातजाति, धर्म, भाषा, लिङ्ग तथा समुदायबीच घृणा र द्वेष फैलाउने अश्लील गीत, सङ्गीत, नृत्य तथा नाराको प्रयोग नगर्न निर्देशन दिएको छ ।
त्यस्तै, तिहारका बेला जुवातास खेल्ने, सार्वजनिक स्थानमा मदिरा सेवन गरेर होहल्ला गर्ने तथा मादक पदार्थ वा लागूऔषध सेवन गरी सवारीसाधन चलाउने गतिविधि रोक्न पनि मन्त्रालयले सम्बन्धित निकायलाई आग्रह गरेको छ ।
देउसी–भैलोका क्रममा अत्यधिक ठूलो आवाजमा साउण्ड सिस्टम तथा अन्य ध्वनि उपकरण प्रयोग नगर्न र अस्पताल, वृद्धाश्रमलगायत संवेदनशील क्षेत्रमा विशेष सावधानी अपनाउन भनिएको छ ।
साथै, सार्वजनिक तथा निजी सम्पत्तिको संरक्षण, वातावरणीय स्वच्छता र फोहोरमैला व्यवस्थापनमा ध्यान दिन पनि मन्त्रालयले नागरिकलाई सचेत गराएको छ ।
चाडपर्वका क्रममा कुनै शङ्कास्पद गतिविधि, दुर्घटना वा अन्य समस्या देखिएमा तत्काल प्रहरीको १०० नम्बर वा आपतकालीन कार्य सञ्चालन केन्द्र (डीईओसी) को १२३४ नम्बरमा सम्पर्क गर्न मन्त्रालयले अनुरोध गरेको छ ।
