काठमाडौं। माघे संक्रान्तिको अवसरमा चलचित्र ‘महाराजधिराज’ को फस्टलुक पोस्टर सार्वजनिक गरिएको छ । चलचित्रको स्लोगन ‘अनेकौं समस्या म देख्छु जगत्मा, छ कि दोष हाम्रो आफ्नै रगतमा’ राखिएको छ ।
छत्रेश्वरी म्यानेजमेन्ट प्रा.लिको प्रस्तुति रहेको फिल्मको फष्टलुक्स पोष्टरमा ‘अनेकौँ समस्या म देख्छु जगत्मा, छ कि दोष हाम्रो आफ्नै रगतमा’ राखिएको छ । पोस्टरमा दुई जना कलाकार देखिएका छन् । एक जना राजर्षि पहिरनमा रहेको देखिन्छन् भने अर्का व्यक्ति नग्न अवस्थामा प्रस्तुत गरिएको छ ।
यस पोस्टरमा अभिनेता पल शाहको दुई फरक लुक देख्न सकिन्छ । एक लुकमा उनी राज परिवारको पहिरनमा शीरमा श्रीपेच, हातमा राजदण्ड बोकेर उभिएका छन् । उनी अर्को लुकमा अगाडि कुर्सीमा बसेका ‘न्युड’ अवस्थामा प्रस्तुत छन् । पोस्टरमा देखिएका उनको क्यारेक्टरले फिल्मको कथाबारे कौतुहलता जगाएको छ ।
सामाजिक सञ्जाल फेसबुकमा लेख्दै अभिनेता शाहले चलचित्र ‘महाराजधिराज’ आगामी वर्ष २०८२ सालको फूलपातीमा प्रदर्शन गरिने जानकारी दिए । यस चलचित्रका प्रस्तुतकर्ता विराज विष्ट हुन् । निर्देशक परिच्छेद सेनकै लेखन रहने यस फिल्मलाई टोपेन्द्र बिष्ट, चक्र बहादुर केसी र रबी खड्काले लगानी गरेका छन् ।
