जाजरकोट। जाजरकोटमा डिभिजन वन कार्यालयका प्रमुख अमरप्रसाद शाहमाथि कार्यकक्षमै आक्रमण भएको छ। आइतवार कार्यालय समयमै अज्ञात समूहले कार्यालयभित्र पसेर उनलाई कुटपिट गरेको हो।

शाहका अनुसार, उनी सामान्य प्रशासनिक फाइलहरू हेर्दै गरेका बेला ३–४ जनाको समूह एक्कासी कार्यकक्षमा पसेर दुर्व्यवहार गर्दै हातपातमा उत्रिएको थियो। ‘अचानक आक्रोशित शैलीमा चिच्याउँदै कोठामा छिरेर मलाई धकेल्दै कुट्न थाले,’ शाहले भने, ‘सरकारी कार्यालयमै यस्तो अवस्था आउँछ भन्ने कल्पनासमेत गरेको थिइनँ।’

आक्रमणको स्पष्ट कारण नखुले पनि प्रारम्भिक अनुमान अनुसार व्यक्तिगत रिसइवी वा वनसम्बन्धी विवादका कारण घटना भएको हुनसक्ने बताइएको छ। घटनापछि स्थानीय प्रशासन र प्रहरी टोलीले अनुसन्धान थालेको छ।

यो घटनाले सरकारी कर्मचारीहरूको कार्यस्थलमै सुरक्षा चुनौती बढेको देखिएको छ। प्रशासनले घटनामा संलग्न व्यक्तिहरूको पहिचान गरी कडा कारबाही गर्ने प्रतिबद्धता जनाएको छ।