सुर्खेत। विभिन्न विवाद, अवरोध र कानुनी प्रक्रिया बीच अल्झिएको कोहलपुर–सुर्खेत १३२ केभी विद्युत् प्रसारण लाइन विस्तार आयोजनाले पुनः गति लिएको छ। बाँकेको कोहलपुरदेखि कर्णाली प्रदेशको राजधानी सुर्खेतसम्म लाइन विस्तारको बाटो अब खुलेको छ।
बाँकेको बैजनाथ गाउँपालिका वडा नं. १ गाभर र वडा नं. ४ बानियाँभारमा स्थानीय अवरोधका कारण रोकिएको लाइन विस्तार कार्य उच्च अदालतको आदेशपछि पुनः सुरु भएको हो।
मुख्यमन्त्री यामलाल कँडेलले न्यायिक निर्णयले कामलाई सहज बनाएको बताउँदै भने, “अदालतको आदेशसँगै अब आयोजनाको बाँकी काम तीव्र गतिमा सम्पन्न हुनेछ।”
आयोजना प्रमुख रवि चौधरीका अनुसार, बाँकी काम ६ महिनाभित्र सम्पन्न गर्ने लक्ष्यका साथ निर्माण अघि बढाइएको छ। विवादित क्षेत्रमध्ये वीरेन्द्रनगर नगरपालिका–११ सुब्बाकुनामा पनि अब विवाद समाधान भएको छ।
करिब ७० करोड रुपैयाँ लागतमा निर्माणाधीन उक्त आयोजनाको हालसम्म ९५ प्रतिशत भौतिक प्रगति भइसकेको छ। आयोजनाअन्तर्गत हालसम्म ४० किलोमिटर तार तानिएको छ भने अब १२ किलोमिटर मात्र बाँकी रहेको छ।
फाउन्डेसन निर्माणको काम अन्तिम चरणमा छ। १ सय ५६ वटा फाउन्डेसन तयार भइसकेका छन् भने अब थप ६ वटा मात्र बनाउनु बाँकी रहेको आयोजना प्रमुख चौधरीले जानकारी दिए।
आयोजनाको मार्गमा पर्ने रूख हटाउने क्रममा आलोचना पनि हुँदै आएको छ। हालसम्म ५ हजार रूख काटिएको छ भने थप ५ हजार ५ सय काट्ने तयारीमा छ। यद्यपि, आयोजना कार्यालयले वातावरणीय मापदण्ड पालना गर्दै रूख कटान भइरहेको बताएको छ।
यो लाइन विस्तारसँगै कर्णाली प्रदेशको विद्युत आपूर्ति थप सुदृढ हुने अनुमान गरिएको छ। आयोजनाको सफलताले भविष्यमा औद्योगिक, कृषि तथा आवासीय क्षेत्रमा विद्युत वितरण सहज हुने अपेक्षा गरिएको छ।
ऊर्जा पूर्वाधार विस्तारको यो पहलले कर्णालीको समग्र विकासमा सकारात्मक प्रभाव पार्ने सरोकारवालाहरूको विश्वास छ।
