काठमाडौं। नेकपा (एमाले) का केन्द्रीय सदस्य पदम गिरीले आगामी निर्वाचनको ‘मिसन ०८४’ सफल बनाउन अध्यक्ष केपी शर्मा ओलीको निरन्तर नेतृत्व अपरिहार्य रहेको धारणा व्यक्त गरेका छन्।

सोमबारदेखि सुरु भएको पार्टीको केन्द्रीय कमिटी बैठकमा बोल्दै गिरीले पार्टीको अस्तित्व जोगाउन ओलीको योगदान निर्णायक रहेको बताए। उनले भने, “केपी ओलीले संकटपूर्ण अवस्थामा पार्टीलाई अघि बढाउनुभयो, र २०७९ को निर्वाचनमा महागठबन्धनको चुनौतीबीच पनि एमाले लोकप्रिय मतका आधारमा पहिलो दल बन्न सफल भयो।”

पूर्वराष्ट्रपति विद्यादेवी भण्डारीको सक्रियतासम्बन्धी उठेको बहसबारे बोल्दै गिरीले पार्टी सदस्यता नवीकरणको विषय केवल प्राविधिक नभई राजनीतिक महत्वको रहेको बताए।

उनको भनाइले ओली नेतृत्वबारे भित्रभित्रै चलिरहेको बहसबीच समर्थनको स्वर थपिएको छ।