सिरहा। सिरहाको लहान–३ स्थित अस्पताल चोकमा सशस्त्र प्रहरीले स्रोत नखुलेको १० लाख १ हजार ६९५ रुपैयाँसहित एक भारतीय नागरिकलाई पक्राउ गरेको छ।
पक्राउ पर्ने व्यक्ति भारतको मधुवनी जिल्लाको लौकाहा बजार निवासी २४ वर्षीय राहुल कुमार रहेको सशस्त्र प्रहरी बल, नेपाल नं. ७ गण सिरहाका गणपति सशस्त्र प्रहरी उपरीक्षक नरेश भण्डारीले जानकारी दिएका छन्।
उनका अनुसार शुक्रबार बिहान करिब ९ः३० बजे सुरक्षा वेश क्याम्प लहानबाट खटिएको ‘चेक प्वाइन्ट’ टोलीले इनरुवाबाट लहानतर्फ जाँदै गरेको यात्रुवाहक बस जाँच गर्ने क्रममा उक्त रकमसहित राहुललाई नियन्त्रणमा लिएको हो।
नगद रकमको वैधानिक स्रोत नदेखिएपछि उनलाई नियन्त्रणमा लिइएको प्रहरीले जनाएको छ। पक्राउ परेका कुमारलाई बरामद नगदसहित आवश्यक कारबाहीको लागि भन्सार कार्यालयमा बुझाउने प्रक्रिया अगाडि बढाइएको उपरीक्षक भण्डारीले बताए।
