सुर्खेत। कालीकोटको महाबै गाउँपालिकाले सामाजिक सुरक्षा भत्ता लिने तर हाल विभिन्न शहरहरूमा बसोबास गरिरहेका वृद्धवृद्धालाई लक्षित गर्दै सुर्खेतमा बायोमेट्रिक शिविर सञ्चालन गरेको छ।
कर्णाली प्रदेशको राजधानी सुर्खेतमा साउन १२ गतेदेखि १९ गतेसम्म सञ्चालन हुने एक साताको शिविरले भत्ता नवीकरण गर्न नपाएका लाभग्राहीहरूलाई सेवा दिइरहेको गाउँपालिकाले जनाएको छ।
यस वर्षदेखि सामाजिक सुरक्षा भत्ता लिन बायोमेट्रिक अनिवार्य गरिएको हुँदा, बर्दिया, बाँके, कैलाली र सुर्खेतमा बसोबास गरिरहेका लाभग्राहीलाई लक्षित गरी शिविर सञ्चालन गरिएको हो।
शिविरका सम्पर्क व्यक्ति मनराज कार्कीका अनुसार, “व्यक्ति स्वयं उपस्थित हुनुपर्ने व्यवस्था भएकाले बिरामी, अशक्त वा आफन्तको साथ शहरमा रहेका वृद्धवृद्धालाई लक्षित गर्दै शिविर सञ्चालन गरिएको हो।”
साउन १५ गते १२ बजेसम्म ८२ जना लाभग्राहीले सेवा लिइसकेको र आगामी दिनमा यो संख्या अझै बढ्ने अनुमान गरिएको छ।
गाउँपालिका अध्यक्ष खेमबहादुर सिंहले भने, “हाम्रा धेरै लाभग्राही स्वास्थ्य उपचारलगायत कारणले शहरमा हुनुहुन्छ। उहाँहरू हिँडडुल गर्न सक्ने अवस्थामा पनि हुनुहुन्न। त्यसैले उनीहरूलाई सहज बनाउन शहरमै सेवा पु¥याइएको हो।”
दूरदराजका गाउँपालिकाबाट बाहिर बसोबास गरिरहेका वृद्धवृद्धालाई लक्षित सेवा पुर्याएर सामाजिक सुरक्षा सुनिश्चित गर्न गरिएको यो प्रयास अन्य पालिकाका लागि पनि अनुकरणीय हुनसक्ने देखिन्छ।
