कैलाली। कैलाली कारागार शुक्रबार मध्यरातिदेखि कैदीहरूको नियन्त्रणमा रहेको छ। कैदीहरूबीच भएको भीषण झडपमा धनगढी उपमहानगरपालिका–४ का ४० वर्षीय भरत चौधरीको मृत्यु भएको छ भने ४९ जना घाइते भएका छन्।
मध्यरातिको घटनापछि सुरक्षा निकायका पदाधिकारीहरू कारागारभित्र प्रवेश गर्न सकेका छैनन्। कैलालीका प्रमुख जिल्ला अधिकारी गोगनबहादुर हमाल, प्रहरी उपरीक्षक बालनसिंह राणा र सशस्त्र प्रहरीका एसपी सुरेन्द्रराज रञ्जितसहितको टोली अवस्था बुझ्न पुगे पनि कैदीहरूले भित्र पस्न दिएनन्।
जिल्ला सुरक्षा समितिको निर्णयअनुसार कारागार सुरक्षामा सशस्त्र प्रहरी परिचालन गरिएको छ। तर, राष्ट्रिय मानव अधिकार आयोगको टोली समेत घटनास्थलसम्म पुग्न नसकेको जनाएको छ।
उक्त परिस्थितिबारे छलफल गर्न गृहमन्त्री रमेश लेखकले नेपाल प्रहरी, सशस्त्र प्रहरी र राष्ट्रिय अनुसन्धान विभागका प्रमुखहरूलाई गृह मन्त्रालयमा बोलाएका छन्। गृह मन्त्रालयका अनुसार बैठकमा धनगढीस्थित कारागारको अवस्थाबारे मूल्याङ्कन भइरहेको छ।
