रुपन्देही। नेकपा एमाले रुपन्देहीले क्षेत्र नं ३ को उपनिर्वाचनका लागि उम्मेदवार चयनको जिम्मेवारी जिल्ला पदाधिकारीलाई दिएको छ।
यसअघि निर्वाचन क्षेत्र नं ३ को बैठकले चार आकांक्षीको नाम जिल्ला कमिटीमा सिफारिस गरेको थियो। मंगलबार बुटवलमा बसेको जिल्ला सचिवालय बैठकले तीमध्येबाट उम्मेदवार टुंग्याउन पदाधिकारीलाई अख्तियारी दिएको प्रचार विभाग प्रमुख मीन प्रसाद पौडेलले जानकारी दिए। पदाधिकारीले छनोट गरेको नाम प्रदेश र केन्द्रीय कमिटीमा सिफारिस गरिनेछ।
क्षेत्रीय कमिटीले पोलिटब्युरो सदस्य खिमलाल भट्टराई, सिद्धार्थनगरका पूर्व नगरप्रमुख हरि अधिकारी, यज्ञ जित शाह र शशि पौडेललाई सिफारिस गरेको हो। पार्टीभित्र सर्वसम्मत उम्मेदवारको टुंगो लगाउन छलफल चलिरहेको नेताहरूले जनाएका छन्।
२०७९ सालको निर्वाचनमा यस क्षेत्रबाट राप्रपाका दीपक बोहरा निर्वाचित भएका थिए। उनको निधनपछि कात्तिक १७ गते उपनिर्वाचन हुने तय भएको हो। अघिल्लो निर्वाचनमा एमालेले राप्रपालाई समर्थन गरेको थियो।
