रुपन्देही। रुपन्देही–३ को उपनिर्वाचनलाई लक्षित गर्दै राष्ट्रिय स्वतन्त्र पार्टी (रास्वपा) लुम्बिनी प्रदेशले भैरहवामा तीन दिने प्रशिक्षण कार्यक्रम गर्न लागेको छ।
रास्वपा लुम्बिनी प्रदेश प्रशिक्षण प्रतिष्ठानको आयोजनामा साउन २९, ३० र ३१ गते हुने कार्यक्रममा पार्टीका शीर्ष नेताहरूले प्रशिक्षण दिनेछन्। प्रदेश सभापति देवराज पाठकका अनुसार कार्यवाहक सभापति डिपी आचार्य, उपसभापति स्वर्णिम वाग्ले, प्रवक्ता मनिष झा, पूर्व शिक्षा मन्त्री सुमना श्रेष्ठलगायतले पार्टी सबलीकरण, उपनिर्वाचन रणनीति र सदस्य वृद्धिबारे प्रशिक्षण दिने छन्।
कार्यक्रममा प्रदेश समिति, सल्लाहकार, जिल्ला र क्षेत्रीय पदाधिकारी, प्रदेश विभागका सदस्यलगायतको सहभागिता रहनेछ। पहिलो दिन (२९ गते) सबै जिल्लाका सभापतिहरुको बन्द शिविर हुनेछ भने ३० र ३१ गते पालिका पदाधिकारी तथा प्रदेश कमिटी सदस्यहरूबीच प्रशिक्षण हुनेछ।
यसअघि रास्वपाले रुपन्देहीमै संसदीय दलको बैठक गरी उपनिर्वाचन तयारीबारे छलफल गरेको थियो।
