सुर्खेत। कर्णाली प्रदेश सरकारले स्वास्थ्य र कृषि क्षेत्रसम्बन्धी महत्त्वपूर्ण निर्णय गर्दै प्रदेश अस्पतालको निर्देशकमा डा. गणेश थापालाई नियुक्त गरेको छ।
बुधबार बसेको मन्त्रिपरिषद् बैठकले थापालाई औपचारिक रूपमा निर्देशक बनाउने निर्णय गरेको हो। उनी यसअघि निमित्त निर्देशकका रूपमा काम गर्दै आएका थिए।
यसै बैठकले कृषि क्षेत्रमा उत्पादकत्व बढाउन ‘उच्च मूल्य कृषि वस्तु उत्थानशील कार्यक्रम’ सञ्चालन गर्न स्वीकृति दिएको छ। नेपाल सरकार, प्रदेश सरकार, स्थानीय तह, अन्तर्राष्ट्रिय कृषि विकास कोष र एसियाली विकास बैंकको सहकार्यमा सञ्चालन हुने उक्त कार्यक्रमका लागि आवश्यक अस्थायी दरबन्दी पनि पारित गरिएको छ।
कार्यक्रमअन्तर्गत सुर्खेतमा मुख्य कार्यालय रहनेछ भने जाजरकोट र जुम्लामा ‘करिडोर कार्यक्रम’ स्थापना गरी कार्यान्वयन अघि बढाइनेछ।
यस्तै, बैठकले मुख्यमन्त्रीलाई प्रदेश सचिवहरूको पदस्थापन र सरुवासम्बन्धी अधिकार प्रत्यायोजन गर्ने निर्णयसमेत गरेको छ। यसअघि यो अधिकार मन्त्रिपरिषद्मै सीमित थियो।
