वीरेन्द्रनगर। अख्तियार दुरुपयोग अनुसन्धान आयोगले जाजरकोटको भेरी नगरपालिकामा वडा कार्यालय भवन निर्माण ठेक्कामा अनियमितता गरेको आरोपमा प्रमुख प्रशासकीय अधिकृत दलबहादुर घर्तीसहित ८ जना विरुद्ध भ्रष्टाचार मुद्दा दायर गरेको छ।
आयोगले नगरपालिकाका ६ जना कर्मचारी र ठेकेदार कम्पनीका २ जना साझेदारलाई ३६ लाख २० हजार ५७८ रुपैयाँ १० पैसा बिगोसहित बिहीबार विशेष अदालत काठमाडौंमा आरोपपत्र पेश गरेको छ।
अख्तियारका अनुसार आर्थिक वर्ष २०७८/७९ मा वडा नम्बर ६, ९ र १० को कार्यालय भवन ठेक्का प्रक्रियामा सार्वजनिक खरिद नियमावली उल्लङ्घन गरी भ्रष्टाचार भएको पाइएको छ। मुख्य दोषीका रूपमा घर्तीसहित इन्जिनीयर मोहन मल्ल, कानुन अधिकृत प्रकाशकुमार शाही, सामाजिक विकास अधिकृत अनिस साह, लेखापाल राजेन्द्रबहादुर कठायत, जिन्सी शाखा प्रमुख कृतिवहादुर थापा र ठेकेदार गंगाकुमारी खड्का तथा चित्रबहादुर बोहरा समावेश छन्।
