जुम्ला। सिंजा गाउँपालिकामा बजेटको असन्तुष्टि जनाउँदै चार वडाध्यक्षसहित केही प्रतिनिधिहरूले लगाएको ताला तीन दिन बितिसक्दा पनि खुल्न सकेको छैन। ताला लाग्दा पालिकामा दैनिक कामकाज ठप्प भएको छ।
गाउँपालिकाका प्रमुख प्रशासकीय अधिकृत टेकबहादुर शाहीका अनुसार अध्यक्ष पूर्णप्रसाद धिताल हाल कामको सिलसिलामा काठमाडौंमा रहेका कारण पालिकामा लगाइएको ताला खोल्न असम्भव छ।
असन्तुष्ट वडाध्यक्षले ताला खोल्न अस्वीकार गर्दै बजेटसँग सम्बन्धित माग पूरा नभएसम्म यस अडानमा रहेको बताएका छन्। यस कारण नागरिकले गाउँपालिकाबाट पाउनुपर्ने सेवा प्रभावित भएको छ। कांग्रेस, एमाले, एकीकृत समाजवादी, र राप्रपाका नेताहरूले बजेटको विरोधमा संघर्ष समिति समेत गठन गरेका छन्।
