काठमाडौँ। नेपाली क्रिकेट टोलीले साउथ अस्ट्रेलिया (एसए) सँगको एकदिवसीय अभ्यास खेल जितेको छ ।
आज भएको खेलमा साउथ अस्ट्रेलियाले दिएको दुई सय ४३ रनको लक्ष्य नेपालले ५ बल बाँकी छँदा ८ विकेट गुमाएर भेट्टाएको हो । नेपालका लागि कप्तान रोहित पौडेलले अविजित एक सय एक रन बनाए ।
एक सय ६१ रनमा ८ विकेट गुमेको अवस्थाबाट रोहित र सोमपाल कामीले अर्धशतकीय साझेदारी गरे । सोमपाल ४० रनमा अविजित रहे । त्यसअघि टस हारेर पहिले ब्याटिङको निम्तो पाएको साउथ अस्ट्रेलिया निर्धारित ४५ ओभरमा २ सय ४२ रनमा अलआउट हुँदै नेपाललाई दुई सय ४३ रनको लक्ष्य दिएको थियो ।
टप एन्ड टी–२० सिरिज सकिएपछि भएको अभ्यास टी–२० मा अस्ट्रेलियन क्यापिटल टेरिटोरीलाई हराउँदा एसएसँग पराजित भएको थियो । आउँदो विश्वकप छनोटको तयारीका लागि नेपाली टोली अस्ट्रेलिया भ्रमणमा छ ।
