काठमाडौं। भारतको गुहाटीमा जारी पाँच खेलको टी–२० सिरिजको चौथो खेलमा नेपाल ए टीमले आसामसँग १८ रनले पराजित भएको छ।
एसीए स्टेडियममा टस हारेर पहिले ब्याटिङ गरेको आसामले २० ओभरमा ५ विकेट गुमाउँदै १७४ रन बनायो। नेपाल ए ले १७५ रनको लक्ष्य पछ्याउँदा ९ विकेट गुमाउँदै १५६ रनमा रोकियो। कप्तान अनिल कुमार शाहले ५० बलमा ७ चौका र २ छक्का प्रहार गर्दै सर्वाधिक ६७ रन बनाए।
नेपालका लागि इशान पाण्डेले २७ रन बनाए भने पावरप्लेमा सन्दीप जोरा ११ र वसिर अहमद २ रनमा आउट भए। अन्य ब्याटरहरू सन्तोषजनक प्रदर्शन गर्न सकेनन्। आसामका लागि अभिनव चौधरी र अब्दुल अजिज कुरासीले ३–३ विकेट लिए।
पहिले ब्याटिङ गरेको आसाममा कप्तान सुमित घडिअन्करले ७० रन बनाएर रिटायर आउट भए भने ऋषिकेश तामुलिले ४६ रन जोड्न सफल भए। नेपालका लागि आकाश चन्दले २ विकेट लिए।
यस नतिजासँगै सिरिज २–२ बराबरीमा पुगेको छ। अन्तिम खेल सोमबार साँझ ५ बजे हुनेछ।
