सुर्खेत। नक्कली विवाहमार्फत ठगी गरेको आरोपमा जिल्ला प्रहरी कार्यालय सुर्खेतले दुई जनालाई नियन्त्रणमा लिएको छ।
प्रहरीका अनुसार पक्राउ पर्नेमा दैलेखका ४० वर्षीय गोपाल कुमार विक र अछामकी ३८ वर्षीया भविसरा रास्कोटी मगर छन्।
प्रहरी नायब उपरीक्षक मोहनजंग बुढ्थापाले बताएअनुसार उनीहरूले सामाजिक सञ्जालमार्फत चिनजान बढाई आफन्त जस्तो भूमिका निभाउँदै विवाह गर्ने गर्थे। विवाहपछि बेहुलीले नगद र गरगहना लिएर हराउने गरेको अनुसन्धानबाट पुष्टि भएको छ।
फरक–फरक समयमा एउटै महिलाले विभिन्न पुरुषसँग विवाह गरेर ठगी गरेको उजुरी दर्ता भएपछि प्रहरीले उनीहरूलाई पक्राउ गरेको हो।
पक्राउ परेका विक हाल वीरेन्द्रनगर–१० मा रहेको ‘होटल सदाशंकर’ सञ्चालन गर्दै आएका थिए भने रास्कोटी पनि सोही ठाउँमा बस्दै आएकी थिइन्। उनीहरू विरुद्ध आपराधिक लाभ र ठगी सम्बन्धी मुद्दामा म्याद थप गरी अनुसन्धान अगाडि बढाइएको प्रहरीले जनाएको छ।
