कालिकोट। रास्कोट नगरपालिका–८ का वडाध्यक्ष मनिराज बराल बुधबारदेखि बेपत्ता भएका छन्। शुक्रबार कर्णाली नदी किनारमा बाहुला काटिएको अवस्थामा उनको कोट फेला परेको प्रहरीले जनाएको छ।

आफन्तले भेटिएको कोट बरालकै भएको पुष्टि गरेका छन्। बराल ससुराली जाने भनेर घरबाट निस्किएका थिए तर त्यसपछि सम्पर्कमा आएका छैनन्। प्रहरीले स्थानीयसहित खोजी कार्य तीव्र पारेको छ।

नगरपालिकाका अनुसार उनी केही समयदेखि मानसिक स्वास्थ्यको उपचारमा थिए। बराल २०७९ सालको स्थानीय तह निर्वाचनमा माओवादीबाट निर्वाचित भएका हुन्।