जुम्ला। जिल्ला समन्वय समिति जुम्लाको कार्यालय परिसरमा शनिबार बेलुकी सकेट बम भेटिएको छ।
पर्खाल निर्माणमा संलग्न कामदारले उक्त बम देखेपछि तत्काल प्रहरी र सेनालाई खबर गरिएको समितिका प्रमुख गौरीनन्द आचार्यले जानकारी दिए।
उनका अनुसार बम खिया लागेको अवस्थामा रहेको छ र मोटो जीआई पाइप प्रयोग गरी बनाइएको जस्तो देखिन्छ। बम भेटिएपछि कार्यालय क्षेत्रमा त्रास फैलिएको छ भने प्रहरी र सेनाले उक्त स्थानलाई घेराबन्दी गरेका छन्।
आचार्यले सेनाले माथिल्लो आदेश पर्खिरहेको र आदेश मिल्नेबित्तिकै डिस्पोज गर्ने तयारी भइरहेको बताए। समितिको सानो हलको पछाडिपट्टि भेटिएको यो बम संकटकालताका माओवादीहरूले छोडेको हुन सक्ने अनुमान गरिएको छ।
कार्यालय खुले पनि काम गर्ने वातावरण नभएको आचार्यले बताए। जिल्ला प्रहरी कार्यालय जुम्लाका प्रहरी निरीक्षक असिम हमालले सेनाको टोली बम डिस्पोजका लागि घटनास्थलमा पुगेको पुष्टि गरेका छन्।
