सुर्खेत। मुख्यमन्त्री यामलाल कँडेलले हालैको जेनजी आन्दोलनका क्रममा भएको तोडफोड र आगजनी घटनाले कर्णाली प्रदेशलाई ठूलो क्षति पुर्याएको बताएका छन्।
उनका अनुसार, प्रदेश सभा, लेखा नियन्त्रण कार्यालय, नापी कार्यालयदेखि पार्टी कार्यालय र नेताहरूका घरसम्म तोडफोड तथा आगजनीमा परेका छन्।
पत्रकार सम्मेलनमा उनले आन्दोलनलाई उद्देश्यभन्दा भिन्न तरिकाले प्रयोग गरिएर युवाहरूलाई भड्काइएको आरोप लगाए। ‘जेनजीका नाममा भएको विध्वंस स्वीकार्य छैन,’ उनले स्पष्ट पारे।
कँडेलले संघीय राजधानीमा भएको घटनाको प्रभाव कर्णालीसम्म फैलिएको बताए। सुरक्षा व्यवस्थाको कारण आफू कपासेस्थित सेनाको ब्यारेकमा बस्न बाध्य भएको उनको भनाइ छ।
उनले दलहरूबीच समन्वय गरेर समस्या समाधान गर्नुपर्नेमा जोड दिए। साथै, प्रमुख दलहरू बलियो भए मात्रै समाज र राष्ट्र बलियो हुने तर्कसमेत उनले दोहोर्याए।
