सुर्खेत। कर्णाली प्रदेश सरकारले जेनजी आन्दोलनका क्रममा आफ्ना कार्यालय र कर्मचारी आवासहरूबाट चोरी र लुटपाट भएका सामग्री इमानदारीपूर्वक फिर्ता गर्न सर्वसाधारणसँग आग्रह गरेको छ ।
मुख्यमन्त्री तथा मन्त्रिपरिषद्को कार्यालयले सोमबार सार्वजनिक गरेको सूचनामा भदौ २३ र २४ गतेको आन्दोलनमा प्रदेशसभा, लेखा नियन्त्रक कार्यालयसहित विभिन्न मन्त्रालय, आयोग, निर्देशनालय, कार्यालय तथा आवासहरूमा तोडफोड, आगजनी र लुटपाट भएको उल्लेख छ ।
प्रदेश सभा र लेखा नियन्त्रक कार्यालय जलेर ध्वस्त भएका छन् भने अन्य कार्यालयका जिन्सी सामग्री चोरी भएका छन् । कार्यालयका अनुसार घटनाका भिडियो र सिसिटिभी फुटेज सुरक्षित रहेका छन् र थप पहिचानको प्रक्रिया अघि बढाइँदै छ ।
यदि कसैले सामग्री लिएको भए नजिकैको प्रहरी कार्यालय वा सम्बन्धित कार्यालयमा इमानदारीपूर्वक बुझाइदिन सरकारको आग्रह छ ।
