जुम्ला। नेपाल पत्रकार महासंघ जुम्ला शाखाले पत्रकारितामा योगदान पुर्याउँदै आएका तीन जना पत्रकारलाई विशेष पुरस्कारद्वारा सम्मान गरेको छ।
पुरस्कृत हुनेमा लक्ष्मी न्यौपाने (रेडियो नारी आवाज), कालीबहादुर परियार (दूबो खबर) र विजय रावत (कर्णाली सवाल) छन्।
महासंघका अनुसार न्यौपानेलाई गौरी पदम स्मृति, परियारलाई युवा तथा खेलकुद र रावतलाई कृषि तथा पर्यटन विधामा पुरस्कृत गरिएको हो।
अध्यक्ष पूर्णप्रसाद चौलागाईंले पुरस्कार वितरणले जिल्लामा पत्रकारिताको व्यावसायिकता प्रवर्द्धन गर्नुका साथै पत्रकारलाई अझ हौसला दिने विश्वास व्यक्त गरे।
पुरस्कार स्वरूप तीनै जना पत्रकारलाई १०–१० हजार रुपैयाँ नगद, कदरपत्र र दोसल्ला प्रदान गरिएको थियो।
