काठमाडौँ। प्रहरीले पूर्वपरराष्ट्रमन्त्री आरजु राणाका भाइ भुषण राणाबारे अनुसन्धान थालेको छ ।
२३ र २४ भदौको आन्दोलनका बेला पूर्वप्रधानमन्त्री एवं कांग्रेस सभापति शेरबहादुर देउवाको घरमा अस्वाभाविक रकम भेटिएको थियो । त्यसबारे सम्पत्ति शुद्धीकरण अनुसन्धान विभागले छानबिन गरिरहेको हो ।
यही बेला प्रहरीको केन्द्रीय अनुसन्धान ब्युरो (सीआईबी)ले देउवापत्नी आरजुका भाइ भुषणबारे छानबिन गरेको हो । सीआईबीका प्रमुख प्रहरी अतिरिक्त महानिरीक्षक (एआईजी) मनोज केसीले भुषणको घरमा प्रहरी टोली पुगेको पुष्टि गरे । ‘तर, उहाँ विगत एक महिनादेखि त्यहाँ हुनुहुन्न,’ केसीले कान्तिपुरसँग भने । उनले राणाविरुद्ध के विषयमा छानबिन भइरहेको हो भन्नेबारे विस्तृतमा बताएनन् ।
