रुकुम पश्चिम । मुसिकोट नगरपालिकाले अस्थायी नियुक्ति र करार सेवामा कार्यरत कर्मचारीहरूको सम्झौता रद्द गर्ने निर्णयबाट पछि हटेको छ।
गत शुक्रबार सूचना जारी गरेर अस्थायी तथा करार कर्मचारीको नियुक्ति र सम्झौता समाप्त हुने घोषणा गरेको नगरपालिकाले आइतबार अर्को सूचना जारी गर्दै “सम्झौता यथावत रहने” जनाएको हो।
प्रमुख प्रशासकीय अधिकृत मोहनप्रकाश गिरीले जारी गरेको सूचनामा अघिल्लो निर्णय नगर कार्यपालिकाको आधिकारिक निर्णयबिनै गरिएको स्वीकार गर्दै हाललाई अस्थायी र करार सम्झौता कायम रहेको उल्लेख छ।
नगरपालिकाको अघिल्लो निर्णयमा संघीय सरकारका परिपत्रहरूको आधारमा करार शिक्षक, स्वास्थ्यकर्मीलगायतको नियुक्ति र सम्झौता असोज २७ गतेदेखि रद्द हुने भनिएको थियो। तर सो कदमप्रति विभिन्न राजनीतिक दल र सरोकारवाला पक्षले आपत्ति जनाएपछि निर्णय फिर्ता गरिएको हो।
