सल्यान। सल्यानका जेन-जी युवाहरूबीचको अनौपचारिक भेटघाट तथा अन्तरक्रिया कार्यक्रम शुक्रबार सल्यान उद्योग वाणिज्य सङ्घको सभाहल, श्रीनगरमा सफलतापूर्वक सम्पन्न भएको छ।

कार्यक्रममा जिल्लाका सबै पालिकाबाट आएका युवाहरूले उत्साहपूर्वक सहभागिता जनाएका थिए। भेटघाटको क्रममा १३ देखि २८ वर्ष उमेर समूह (सन् १९९७ देखि २०१२ मा जन्मिएका) का युवाहरूलाई समेटेर, पछि थप्ने व्यवस्था सहित १०१ सदस्यीय जेन-जी सल्यान तदर्थ समिति गठन गरिएको छ। यस समितिको संयोजन जिम्मेवारी जिल्ला संयोजक युबराज खड्कालाई दिइएको छ।

समितिको पहिलो बैठकमा निर्णय गरिएका मुख्य कार्यसूचीहरू:
१. आगामी तीन महिनाभित्र जिल्लाका सबै १० पालिकामा सम्मेलन तथा भेला आयोजना गरी पालिका र जिल्ला कार्यसमिति चयन गर्ने।
२. असोज २० गते हुने कुमाख मेलामा प्राथमिक स्वास्थ्य सुविधा सुनिश्चित गर्ने, स्वयंसेवक परिचालन गरेर मेलाको सुव्यवस्था मिलाउने, र आगन्तुकहरूको लागि सहज वातावरण सिर्जना गर्ने।
३. जिल्लाका विभिन्न पालिका तथा निकायमा भइरहेको भ्रष्टाचार, बेथिति र अनियमितताविरुद्ध सक्रिय आवाज उठाउने।

कार्यक्रममा सहभागी युवाहरूले सामाजिक, सांस्कृतिक र राजनीतिक सुधारमा Gen-Z पुस्ताले सचेत नागरिकको रूपमा भूमिका निर्वाह गर्नुपर्नेमा जोड दिएका थिए।