काठमाडौँ। अविरल वर्षाका कारण असोज १८ र १९ गते आएको बाढी तथा पहिरोका कारण देशभर मृत्यु हुनेको संख्या ४९ पुगेको छ ।
बाढी, पहिरो, चट्याङ र सडक दुर्घटनासहितका विपद्का घटनाबाट हालसम्म ४९ जनाले ज्यान गुमाएका हुन् भने ११ जना बेपत्ता र १७ जना घाइते भएका छन् ।
यसपालीको वर्षाले सबैभन्दा बढी क्षति इलाममा भएको छ, जहाँ बाढी–पहिरोका कारण ३७ जनाको मृत्यु भएको छ । निरन्तर वर्षापछिको पहिरोमा परि इलाममा मात्रै ५ जना बेपत्ता भएको सशस्त्र प्रहरी बल प्रधान कार्यालयले जनाएको छ।
त्यस्तै उदयपुरमा बाढी तथा पहिरोले २ जनाको मृत्यु र १ जना घाइते भएका छन्। खोटाङमा चट्याङका कारण १ जनाको मृत्यु र ३ जना घाइते भएका छन्। त्यस्तै भोजपुरमा पनि चट्याङबाट २ जना घाइते भएका छन्। पाँचथरमा सडक दुर्घटनामा ६ जनाले ज्यान गुमाए भने ६ जना घाइतेको उपचार भइरहेको छ ।
मधेश प्रदेशमा पनि क्षति पुगेको छ। रौतहटमा चट्याङबाट ३ जनाको मृत्यु भएको छ भने बारामा खोलाले बगाएर एक जना बेपत्ता भएका छन्।
बागमती प्रदेशको काठमाडौं १ जना घाइते भएको छ। ललितपुरको गोदावरी नगरपालिका १४ थैवमा पर्खाल भाँसिदा ३ जना घाइते भएका छन् भने मकवानपुरमा चट्याङबाट एक जना घाइते भएका छन्।
