सल्यान। जिल्लामा स्क्रब टाइफस र उच्च ज्वरोका कारण दुई जनाको मृत्यु भएको छ।
बागचौर नगरपालिका–१ कालाखेतका गजेन्द्र केसी र दार्मा गाउँपालिका–३ दुवाङ्गकी ४७ वर्षीया यनकुमारी खत्रीको उपचारका क्रममा निधन भएको स्वास्थ्य सेवा कार्यालय सल्यानका प्रमुख डा. अर्जुन बुढाले जानकारी दिए।
उनका अनुसार केसीलाई सुरुमा ज्वरो र शरीर दुख्ने समस्या देखिए पनि सुधार नभएपछि जिल्ला अस्पताल सल्यान ल्याइएको थियो। स्वास्थ्य परीक्षणमा स्क्रब टाइफस पुष्टि भएपछि नेपालगञ्ज रेफर गरिएको र त्यहीँ मृत्यु भएको हो।
जिल्लामा पछिल्लो तीन महिनामा ७० जना स्क्रब टाइफसका बिरामी उपचारपछि निको भएर घर फर्किसकेका छन्। समयमै रोगको पहिचान नहुँदा ज्यान गुमाउने घटना बढेको डा. बुढाले बताए।
त्यस्तै, यनकुमारी खत्रीको पनि उच्च ज्वरोका कारण बाहिरी अस्पतालमा मृत्यु भएको दार्मा गाउँपालिकाका स्वास्थ्य शाखा प्रमुख यज्ञबहादुर बस्नेतले जानकारी दिए। स्क्रब टाइफसजस्तै लक्षण देखिए पनि पुष्टि नभएको उनले बताए।
डा. बुढाले लामो समयसम्म ज्वरो आउने र शरीर दुख्ने लक्षण देखिएमा तुरुन्त अस्पतालमा उपचार गर्न सबैलाई आग्रह गरेका छन्।
