सुर्खेत। जिल्ला प्रहरी कार्यालय सुर्खेतले पछिल्ला तीन दिनभित्र लागुऔषध र नक्कली चुरोट कारोबारमा संलग्न ६ जनालाई पक्राउ गरेको छ।
प्रहरी नायव उपरीक्षक मोहनजंग बुढाथोकीका अनुसार वीरेन्द्रनगर–७ बाट लागुऔषधसहित नरेन्द्र ठाडा र ललिता तामाङ पक्राउ परेका छन्। ठाडा पहिले लागुऔषध मुद्दामा सजाय भुक्तान गर्दै काठमाडौँको जगन्नाथ देवल कारागारबाट भागेको कैदी भएको खुलेको छ।
यस्तै, वीरेन्द्रनगर–११ मा गरिएको चेकजाँचका क्रममा २ ग्राम ब्राउनसुगरसहित विशाल ठाडा मगर, राजु सुनार र रमेश सुनार पक्राउ परेका छन्।
त्यसैगरी, राजस्व छलीको नक्कली ‘खुकुरी’ चुरोटसहित वीरेन्द्रनगर–३ का जीवन कुमार शाही नियन्त्रणमा परेका छन्। उनका पसलबाट बिल–बिजक बिना ५०४ बट्टा चुरोट बरामद भएको प्रहरीले जनाएको छ।
प्रहरीका अनुसार सबै घटनाबारे सम्बन्धित ऐनअनुसार मुद्दा दर्ता गरी थप अनुसन्धान भइरहेको छ।
