काठमाडौँ। नेपाल टूरिजम फेस्टिभलको दोस्रो संस्करण काठमाडौँमा हुने भएको छ । एनटीपी मल्टिमिडिया ग्रुपको आयोजना र नेपाल पर्यटन बोर्डको प्रवर्द्धनमा आउँदो पुस १० गते फेस्टिभलको दोस्रो संस्करण काठमाडौँमा हुने भएको हो ।
नेपाल पर्यटन बोर्डको सभाहलमा हुने कार्यक्रममा नेपालको पर्यटन विकास, जेनजी आन्दोलनपछिको अवस्था, पर्यटन व्यवसायीले भोगेका समस्या र जलवायु परिवर्तनले नेपालको पर्यटनमा पारेको असर लगायतका विषयमाथि छलफल हुनेछ ।
‘घुम्ने, घुमाउने र घुम्न प्रेरित गर्ने’ नारा लिएर एनटीपी मल्टिमिडिया ग्रुपले दुई वर्ष अघिदेखि सुरु गरेको फेस्टिभलमा समसामयिक पर्यटनका विषयमा गहन छलफल हुनेछ । नेपालको पर्यटनमा जलवायु परिवर्तनले पारेको असर, जेनजी आन्दोलनपछि पर्यटन प्रवर्द्धनमा देखिएको चुनौति र युवा पर्यटन अभियान्ताका अनुभव समेटेर यसपटकका सेसन तयार गरिएको आयोजक ग्रुपका अध्यक्ष तथा फेस्टिभलका फाउण्डर विष्णु विवेकले जानकारी दिए ।
‘हामी यसपटक नेपालको पर्यटनमा देखिएको तत्कालीन असर र यसले पार्न सक्ने दिगो प्रभावका विषयमा गम्भीर छलफल गर्ने सेसन तयार गर्दैछौँ’ उनले फेस्टिभलको दोस्रो संस्करण घोषणा गर्दै भने, ‘त्यसमध्ये जलवायु परिवर्तनको असर र नेपालका उत्कृष्ट गन्तव्यहरुको अन्तर्राष्ट्रिय प्रवर्द्धनका विषयमा केन्द्रित हुनेछाँै ।’
फेस्टिभलको सुरुवातदेखि स्थापित भएका ‘हिउँ, हिमाल र हिमालय’, ‘माटो, बाटो र दोबाटो’, ट्राभलर एण्ड एक्सप्लोरर’ लगायतका सेसनले यसपटक पनि निरन्तरता पाउँनेछन् । त्यसबाहेक खेल पर्यटन, साहित्य पर्यटन, फोटो पर्यटन लगायतका विषयमा पनि यसपटक छलफल हुने उनले बताए ।
जेनजी आन्दोलनपछि नेपालका समग्र क्षेत्रमा देखिएको युवा नेतृत्वको दबदबा फेस्टिभलमा पनि प्रतिबिम्बित हुनेछ । दोस्रो संस्करणको निरन्तरता र सम्पन्नतापछि फेस्टिभलको तेस्रो संस्करण अमेरिकामा हुनेछ । त्यसबाहेक दोस्रो संस्करणपछि फेस्टिभलका कार्यक्रम तथा अभियानहरु नेपाली डायस्पोरासँग मिलेर नेपालका पर्यटकीय गन्तव्यहरुको अन्तर्राष्ट्रिय प्रवर्द्धनमा केन्द्रित हुनेछ ।
