दाङ। आगामी प्रतिनिधि सभा निर्वाचन २०८२ लाई शान्तिपूर्ण, निष्पक्ष तथा भयरहित वातावरणमा सम्पन्न गराउने उद्देश्यले नेपाली सेनाले दाङको तुल्सीपुर क्षेत्रमा सुरक्षा सतर्कता बढाएको छ।

निर्वाचन सुरक्षालाई लक्षित गर्दै नेपाली सेनाले बख्तरबन्द गाडीसहित रातदिन नियमित गस्ती सञ्चालन गरिरहेको छ। सम्भावित सुरक्षा जोखिमलाई मध्यनजर गर्दै संवेदनशील क्षेत्रहरूमा निगरानी बढाइएको सेनाले जनाएको छ।

सुरक्षा निकायका अनुसार निर्वाचन अवधिभर शान्ति सुरक्षा कायम राख्न नेपाली सेना, नेपाल प्रहरी तथा सशस्त्र प्रहरी बलबीच समन्वयात्मक रूपमा सुरक्षा योजना लागू गरिएको छ।

स्थानीयवासीहरूले सेनाको सक्रिय उपस्थितिले निर्वाचन वातावरण सुरक्षित र विश्वसनीय बनेको बताएका छन्। निर्वाचन नजिकिँदै जाँदा सुरक्षा व्यवस्थालाई अझ प्रभावकारी बनाइने सम्बन्धित निकायले जनाएको छ।