काठमाडौँ। काठमाडौं महानगरपालिकाले गोरखा मिडिया नेटवर्कअन्तर्गत ग्यालेक्सी टेलिभिजनलाई १५ दिनभित्र भाडा बक्यौता भुक्तान गर्न अल्टिमेटम दिएको छ।
महानगरपालिकाको कानुन तथा मानव अधिकार विभागले आज सार्वजनिक सूचना प्रकाशित गर्दै गोरखा मिडिया नेटवर्कद्वारा सञ्चालित ‘ग्लेक्सी फोरके टेलिभिजन’ रहेको घर खाली गर्नको लागि सञ्चालकका नाममा १५ दिने सूचना जारी गरेको हो।
काठमाडौं महानगरपालिका वडा नम्बर ३ स्थित बालुवाटारमा मृगेन्द्रप्रसाद मिश्रको घर भाडामा लिएर गोरखा मिडिया नेटवर्कले ग्यालेक्सी टेलिभिजन सञ्चालन गर्दै आएको थियो।
अदालतले २८ साउन २०८२ मै घरजग्गाको बहाल रकम असुल उपर गरी घर खाली गर्न आदेश दिएको थियो।
त्यतिबेला अदालतले काठमाडौँ महानगरको न्यायिक समितिको नाममा पनि परमादेश जारी गरेको थियो। सोही अनुसार महानगरले गोरखा मिडिया नेटवर्कको नाममा घर खाली गर्न १५ दिने सूचना जारी गरेको हो।
