काठमाडौँ। नेपाल प्रहरीको केन्द्रीय अनुसन्धान ब्युरो (सीआईबी) ले दुग्ध विकास संस्थान (डीडीसी) माथि अनुसन्धान सुरु गरेको छ।

ब्युरोको टोलीले बुधबार लैनचौरस्थित डीडीसीको केन्द्रीय कार्यालयमा पुगेर कागजात नियन्त्रणमा लिएको हो।

यसक्रममा डीडीसीको दुग्धजन्य पदार्थको खरिद-बिकीसम्बन्धी कागजात नियन्त्रणमा लिइएको सीआईबी प्रवक्ता एवं प्रहरी वरिष्ठ उपरीक्षक (एसएसपी) शिवकुमार श्रेष्ठले बताए। “डीडीसीसम्बन्धी केही अनुसन्धान गर्नुपर्ने देखिएकाले हाम्रो टोलीले विवरण संकलन गरेको हो,” श्रेष्ठले भने, “प्रारम्भिक अनुसन्धानको विषय भएकाले अन्य विवरण पछि सार्वजनिक गर्छौं।”

डीडीसी नेपालको सरकारी स्वामित्वको दूग्ध संस्था हो। यसले देशभर दूध संकलन, प्रशोधन, वितरण तथा दुग्धजन्य पदार्थ उत्पादन गर्ने काम गर्छ। किसानबाट दूध खरिद गरी उपभोक्तासम्म सुरक्षित र गुणस्तरीय दुग्ध पदार्थ पुर्‍याउने उद्देश्यअनुरूप डीडीसीले कार्य गर्दै आएको छ।