काठमाडौं। सत्तारूढ राष्ट्रिय स्वतन्त्र पार्टी (रास्वपा) का सभापति रवि लामिछाने नेतृत्वको प्रतिनिधिमण्डल सोमबार भारत भ्रमणमा जाने भएको छ।
भारतीय जनता पार्टी (भाजपा) का अध्यक्ष नितिन नवीनको निमन्त्रणामा हुन लागेको भ्रमणबारे भाजपाले आइतबार औपचारिक जानकारी सार्वजनिक गरेको हो।
भ्रमणका क्रममा रास्वपा टोलीले नयाँदिल्लीमा भाजपा अध्यक्ष नवीनसहित वरिष्ठ नेताहरूसँग भेटवार्ता गर्ने कार्यक्रम रहेको जनाइएको छ। पार्टी स्रोतका अनुसार लामिछानेसँगै सहमहामन्त्री विपिन आचार्य र सचिवालय सदस्य दीपक बोहरा पनि भ्रमण टोलीमा सहभागी हुनेछन्।
नेपाल–भारत सम्बन्धका विषयमा चासो बढिरहेका बेला हुन लागेको यस भ्रमणलाई अर्थपूर्ण रूपमा हेरिएको छ।
भाजपाले जारी गरेको विज्ञप्तिमा रास्वपा र भाजपाबीच पार्टीगत सम्बन्ध सुदृढ गर्ने, संगठनात्मक अनुभव आदानप्रदान गर्ने तथा लोकतान्त्रिक अभ्यासबारे छलफल गर्ने उद्देश्य रहेको उल्लेख गरिएको छ।
