काठमाडौं। नेपाली कम्युनिष्ट पार्टी (नेकपा) सम्वद्ध जनसंगठन जनसांस्कृतिक महासंघको संयोजकमा भीम कुमाखी र सहसंयोजकमा अष्ट लामा चयन भएका छन् । शनिबार सम्पन्न एकता राष्ट्रिय सम्मेलनबाट उनीहरु चयन भएका हुन् ।
साविक नेकपा एससँग सम्वद्ध जनसांस्कृति महासंघका मुख्य नेताहरु एकतामा सामेल नभएपछि तत्कालीन माओवादी केन्द्र सांस्कृतिक तथा साहित्यकर्मीको महासंघमा वर्चस्व देखिएको छ । सम्मेलनले ५१ सदस्यीय कार्यालय टिम, सचिवालय, केन्द्रीय समिति र ४५ सदस्यीय प्राज्ञिक परामर्श समिति गठन गरेको छ ।
नेकपाका सहसंयोजक माधवकुमार नेपालको प्रमुख आतिथ्यतामा सम्पन्न सम्मेलनमा कला, साहित्य तथा संस्कृति विभागका केन्द्रीय संयोजन समितिका सदस्य गंगानारायण श्रेष्ठ, महासंघका इञ्चार्ज चिरन पुन, सहइञ्चार्ज उदय श्रेष्ठ, महासंघका पूर्वइञ्चार्ज डा. गोपाल ठाकुर, नेकपा जनवर्गीय सङ्गठन समन्वय मोर्चाका उपप्रमुख बलराम बाँस्कोटा, जनसांस्कृतिक महासङ्घका पूर्व अध्यक्ष मातृकाप्रसाद पोखरेलसहितको उपस्थिति थियो ।
सम्मेलनमा कलाकारहरू उदय श्रेष्ठ ,झङ्कार बुढा, कर्ण विद्रोही, धनु ज्ञयामी, दीपक राई, एलिना, डम्बर रोकाया, पुजा श्रेष्ठलगायतले गीत प्रस्तुत गरेका थिए । कवि राजाराम राउतले कविता वाचन गरेका थिए ।
