सुर्खेत। कर्णालीका नवनियुक्त मुख्यमन्त्री मंगलबहादुर शाहीले पदभार ग्रहण गरेका छन् ।
मुख्यमन्त्री शाहीले शपथग्रहणपछि मुख्यमन्त्री तथा मन्त्रिपरिषद्को कार्यालय पुगेर औपचारिक रूपमा पदभार ग्रहण गर्दै शासकीय सुधार गर्ने निर्णय गरेका छन्।
मुख्यमन्त्रीले प्रदेश सरकारअन्तर्गत सञ्चालनमा रहेका विकास आयोजनाहरूको प्रगति विवरण सहज रूपमा देख्न सकिने गरी आयोजना ट्र्याकिङ सिस्टम स्थापना तथा सञ्चालन गर्ने निर्णय गरेका छन्।
मुख्यमन्त्री शाहीले सबै प्रकारका विपतको जोखिम न्यूनीकरण तथा व्यवस्थापनका लागि संघीय सरकार र स्थानीय तहसँग समन्वय गर्ने तथा विपद्का वेला तत्काल उद्धार र प्रतिकार्यका लागि क्विक रेस्पोन्सलगायतका कार्यलाई प्राथमिकता दिने निर्णय गरेका छन्।
नवनियुक्त मुख्यमन्त्री शाहीले पदभार ग्रहणकै दिन विकास आयोजनाको प्रभावकारी अनुगमन, शासकीय सुधार, सेवा प्रवाहको गुणस्तर वृद्धि तथा विपत् व्यवस्थापनलाई प्राथमिकतामा राख्ने निर्णयसमेत गरेका छन्।
