काठमाडौँ। मलेसियामा जारी एसीसी प्रिमियर मेन्स कपमा नेपाल हङकङसँग १५ रनले पराजित भएको छ।
क्वालालाम्पुरस्थित बायुमास ओभल मैदानमा हङकङले दिएको २६२ रनको लक्ष्य पछ्याएको नेपाल ४९.१ ओभरमा २४६ रनमा समेटियो।
नेपालका लागि इशान पाण्डेले सर्वाधिक ९० रन बनाए। आशिफ शेखले ४४, दीपेन्द्र सिंह ऐरीले २५, करण केसीले २१ र गुलशन झाले २० रन जोडे। बलिङतर्फ हङकङका अइजज खानले चार विकेट लिए। यसिम मुर्ताजाले दुई तथा किन्चित देवांग सिंह, नुसरुल्ला राणा र अतिकुल इकबालले एक-एक विकेट लिए।
यसअघि टस जितेर पहिले ब्याटिङ गरेको हङकङले ५० ओभरमा ७ विकेट गुमाउँदै २६१ रन बनाएको थियो। हङकङका बाबर हयातले ७ चौका र ७ छक्काको मद्दतमा अविजित ११७ रनको शतकीय पारी खेले। शाहिद वसिफले ४५ र एहसान खानले नटआउट ३५ रन जोडे। नेपालका सन्दीप लामिछानेले चार र शेर मल्लले तीन विकेट लिए।
यस हारका बाबजुद समूह विजेता बनेको नेपालले सेमिफाइनलमा ओमनसँग प्रतिस्पर्धा गर्नेछ। हङकङले अर्को सेमिफाइनलमा यूएईको सामना गर्नेछ। सेमिफाइनल खेल बिहीबार हुनेछ। नेपालले यसअघि समूह चरणमा बहराइन, मलेसिया र साउदी अरेबियालाई पराजित गरेको थियो।
