११ मंसिर, काठमाडौँ। राष्ट्रिय स्वतन्त्र पार्टी (रास्वपा)का सभापति रवि लामिछानेलाई आज काठमाडौं ल्याइने भएको छ ।

सहकारीको रकम अपचलन गरेको आरोपमा पक्राउ परेका रविलाई आज पोखराबाट काठमाडौं ल्याउन लागिएको हो । जिल्ला प्रहरी कास्कीको हिरासतमा रहेका लामिछानेलाई काठमाडौंमा जिल्ला सरकारी वकिलको कार्यालयमा बयानका लागि पोखराबाट ल्याउन लागिएको हो ।

उनलाई आज बिहान ८:४० बजेको बुध्द एयरको उडानबाट काठमाडौं ल्याउने तयारी गरिएको प्रहरी स्रोतको भनाइ छ । काठमाडौंको माइतीघरस्थित जिल्ला सरकारी वकिलको कार्यालयमा लामिछानेलाई ल्याएर बयान लिइनेछ ।

गत आइतबार लामिछानेविरुद्ध काठमाडौं जिल्ला अदालतले पक्राउ पुर्जी जारी गरेको थियो । पक्राउ पुर्जी जारी भएसँगै काठमाडौंको कालिमाटीस्थित स्वर्णलक्ष्मी सहकारी ठगी प्रकरणमा उनीहरुमाथि अनुसन्धानका लागि बाटो खुलेको थियो ।