२३ मंसिर,काठमाडौं। कर्णाली याक्समा अनुबन्धित भारतीय चर्चित क्रिकेटर शिखर धवनले नेपाल प्रिमियर लिग (एनपीएल)का बाँकी खेल नखेल्ने भएका छन्।
कर्णालीसँग शिखरले डिसेम्बर १० सम्म खेल्ने सम्झौता गरेका थिए । उक्त सम्झौताको अवधि सकिएकाले उनी कर्णाली याक्सको अबको खेलमा नदेखिने भएका हुन् ।
याेसँगै विराटनगर किंग्सविरुद्धकाे उनकाे खेल नै एनपिएलकाे याे सिजनका लागि अन्तिम बनेकाे छ । नेपालबाट फर्किएर उनी भारतमा हुन गइरहेको लिगमा खेल्ने बताइएको छ ।
एनपीएलमा ४ खेल खेलेका शिखरले १३६ रन बनाए। उनले विराटनगर किंग्सविरुद्ध ५, चितवन राइनोजविरुद्ध ४५, जनकपुर बोल्ट्सविरुद्ध १४ र काठमाडौं गुर्खाजविरुद्ध अविजित ७२ रन बनाएका थिए। ४ खेल खेलेको कर्णालीले २ खेलमा जीत र २ खेलमा हार व्यहोरेको छ।
